– Mehriban
və bağışlayan Allahın adı ilə!
Çox xoş
gəlmisiniz! Möhtərəm xanımlar, əziz bacılar! Həqiqətən də, bu gün bu ziyalı, Qurani-Kərimə
mənən bağlı olan belə bir izdihamlı toplumu görmək mənim üçün bir bayramdır və
mən bunu Əhli-beytin (ə) kəramətli və məsum xanımı Həzrət Fatimənin (s.ə) bir
lütfü hesab edirəm. Allaha şükürlər olsun, ölkəmizdə elə bir gün gəlib
çatmışdır ki, ölkənin xanımlarından ibarət olan bu əzəmətli toplum böyük, məntiqi
və elmi bir stimulla Quranın tədqiqi, dərk olunması, yayılması və araşdırılması
ilə məşğuldur və ölkədə Qurani-Kərim sahəsindəki fəaliyyətə bu cür rövnəq
verməkdədir. Tam yəqinliklə demək olar ki, bu, Allah-Taala tərəfindən ölkəmizə
nəsib olmuş böyük bir nemətdir.
Möhtərəm
xanımların burada irəli sürdüyü bütün təkliflər diqqətəlayiqdir. İnşaallah, biz
özümüz üçün qeydlər götürəcəyik və şübhəsiz ki, həmin məqamlara diqqət
yetiriləcək, araşdırma aparılacaq və əgər lazım gələrsə, bu işlər müvafiq rəsmi
şəxslərə həvalə olunacaqdır. Ümidvarıq ki, bu elmi, məntiqi və ağlabatan
təkliflərin bir qismi tezliklə həyata keçiriləcək.
Mən iki məsələni
xüsusilə qeyd etmək istəyirəm: bunlardan biri ölkəmizdə və İslam
Respublikasında olduqca əzəmətli və qabarıq olan qadın hərəkatının əsasıdır.
İkinci məsələ isə Quranla bağlıdır. Zənnimcə, ölkəmizdəki xanımların
Qurani-Kərimə bu qədər diqqət yetirib önəm verməsi və Quran sahəsində bu cür
fəallıqla iştirakı elə bir mühüm hadisədir ki, bu, İslam Respublikası dövlət
quruluşunu kənardan seyr edən, onu yaxından tanımaq istəyən, tənqid edən, sevən
və əleyhinə olanların gözü qarşısında bu qurumun böyük bir müvəffəqiyyəti kimi
təzahür etməlidir. Bunu mütləq hamı görməlidir. Əvvəla, qadınların
elmi-tədqiqat sahəsinə qədəm qoymasının özü (Bu isə yalnız Quran sahəsi ilə
məhdudlaşmır) diqqətəlayiq bir faktdır. Mən adətən ölkədə nəşr olunan
jurnalları – elmi, elmi-tədqiqat və elmi-publisistik dərgiləri nəzərdən
keçirirəm. Hər zaman yeni-yeni mövzuları əhatə edən bu jurnallarda müxtəlif sahələrlə
bağlı dərc olunan yazılara diqqət yetirəndə xanım tədqiqatçıların və qələm
sahiblərinin sayının gözəçarpacaq və diqqətəlayiq dərəcədə olduğunu görmək
mümkündür. Ölkəmizdə qadınların teoloji elmlərdə, fiqhdə, fəlsəfədə, ali
təhsilin problemləri, humanitar, habelə təbiət elmləri sahəsində – bir sözlə,
elmin bütün sferalarındakı aktiv iştirakı xeyli qabarıq və gözəçarpandır. Ali
təhsil ocaqları tələbə qızlarımızla doludur. Xanımların iştirakı elmi
dairələrimizi heyranedici bir formada aydınlatmışdır. Bu nədir? Nə baş verir?
Bu, hansı gerçəklikdən xəbər verir? Ölkəmizdə nə zaman bir bu qədər tədqiqatçı,
təhqiqatçı, alim, savadlı, maarifçi və təbliğatçı xanımlar olub? Tarixi
keçmişimizdə heç bir zaman belə bir şey olmayıb. Bəli, zaman-zaman qadınlar içərisində
tək-tük alimlər, görkəmli şəxslər olub. Lakin bu, bütün cəmiyyəti əhatə edəcək,
gözəçarpacaq və böyük əksəriyyəti təşkil edəcək bir səviyyədə olmayıb. Bu, məhz
İslam Respublikasının dövrünə təsadüf edir. Bu gerçəklik məhz ölkəmizdə İslami
hakimiyyətin bərəkətinin nəticəsidir ki, xanımlar elmi sferada öz istedad və
bacarıqlarını belə görkəmli və nəzərəçarpacaq formada nümayiş etdirirlər. Bu,
İslam Respublikası dövlət quruluşunun iftixar duyduğu real faktlardan biridir.
Mən tələbələrlə, gənclərlə təşkil olunan görüşlərdə dəfələrlə qeyd etmişəm ki,
qadın məsələsi ilə bağlı biz qərblilərin iddiaları qarşısında əsla özümüzü
müdafiəyə qalxmırıq. Yəni bu məsələdə biz hücum mövqeyindəyik və qadın problemi
ilə bağlı İslam deyil, məhz Qərb özünü müdafiə edib haqq qazandırmalıdır.
İslam
despotik rejimlərdə daim olduğu kimi qadına tamamilə başqa bir gözlə baxmamış, əksinə
onu bir şəxsiyyət kimi dəyərləndirmişdir. İslamda möminlərə nümunə gətirmək
istədikdə, yəni bu məqsədlə məhz qadın seçilir:
و ضرب اللَّه مثلا
للّذين امنوا امرأت فرعون
“Və
Allaha iman gətirən kəslər üçün Fironun zövcəsini məsəl çəkdi...” (“Təhrim” surəsi,
ayə 11)
Bu, birinci
şəxs.
و مريم ابنت
عمران
“...İmran
qızı Məryəmi də (məsəl çəkdi)...” (“Təhrim” surəsi, ayə 12)
Bu da
nümunə gətirilən ikinci qadın. İman gətirənlər üçün nümunə olaraq iki qadının
adları qeyd olunur. Eyni zamanda kafirlər üçün də iki qadın nümunə gətirilir:
امرأت نوح و امرأت
لوط كانتا تحت عبدين من عبادنا ... فخانتاهما
“(Allah
kafir olanlara) Nuhun zövcəsini və Lutun zövcəsini məsəl çəkdi. Onlar Bizim
bəndələrimizdən olan (əməlisaleh) iki bəndənin (kəbini) altında idilər...” (“Təhrim” surəsi,
ayə 10)
Yəni İslam
dini qadını nəinki yalnız qadınlar üçün, bəlkə bütün cəmiyyət üçün mehvər,
ibrət və ayna təyin edir. Qadın əvəzinə bir kişi də seçilə bilərdi. Lakin bu,
qadına münasibətdə mövcud olmuş yanlış yanaşma tərzinə qarşı bir növ mübarizə
məqsədi daşıyır. Qadına qarşı mövcud olmuş bu baxış həmişə alçaldıcı olmamışdır. Lakin həmişə səhv bir
yanaşma olmuşdur.
Despotik
rejimlərdə qadına həmişə düzgün olmayan baxış aspektindən yanaşılmışdır. Belə
ki, bu günün özündə də Qərbdə vəziyyət eynilə bu cürdür. Ola bilsin ki, Qərb
dövlətlərində bir çox kişilər kimi qadınların da bir qrupu möhtərəm, nüfuzlu və
gözəl bir şəxsiyyət kimi formalaşıb. Lakin qadına münasibətdə Qərb
mədəniyyətinin mahiyyətinə oturmuş baxış ümumilikdə yanlışdır. Əksinə, Qərbdə qadına
münasibət ona bir alət kimi yanaşan, alçaldıcı bir münasibətdir. Qərb bu
ideyanı irəli sürür ki, siz çadra geyməməli, örtünməməlisiniz. Lakin Qərbin bu
baxış aspektinə görə, bunun səbəbi heç də sizin azad olmağınız deyil. Çünki siz
özünüz də həmişə hicabda özünüzü azad hiss etdiyinizi deyirsiniz. Qərb dünyası
tamamilə başqa bir şeyi nəzərdə tutur. O, qadınların kişilərin gözlərini
oxşaması, kişilərin qadınlardan şəriətə uyğun olmayan şəkildə faydalanması üçün
onları cəmiyyətə xüsusi bir formada çıxarmaq istəyir. Komplimentlərlə
ört-basdır olunub üstünə cürbəcür adlar qoyulsa belə, bu, qadına qarşı ən böyük
təhqirdir.
Qadına
qarşı həqiqi ehtiram budur ki, Uca Yaradanın hər bir insanın, o cümlədən
qadının varlığında İlahi bir vergi kimi qoyduğu böyük, qabarıq güc və istedadın,
habelə yalnız qadınların varlığında mövcud olan bacarıq və istedadların
müxtəlif sferalarda üzə çıxması üçün qadına lazımi şərait yaradılsın. Qadın
ailədə, cəmiyyətdə, beynəlxalq arenada, elm, bilik, mərifət və tədqiqat
sferalarında, maarifləndirmə və quruculuq işində özünü büruzə verə bilsin.
Qadına hörmət, bax budur. Görürəm ki, Allahın dəstəyi və yardımı ilə, həmçinin Tanrının
fəziləti sayəsində bizim cəmiyyətimizdə bu, mükəmməl formada öz əksini tapır.
Bəli, əsas məsələ budur ki, bu günümüzdə, Allaha şükürlər olsun ki, ölkəmizin
qadınları elmin bütün sferalarında iştirak edirlər. Həm də aktiv və
təqdirəlayiq bir şəkildə fəaliyyət göstərirlər. Xüsusilə də onların Quranla
əlaqədar qurumlara, Qurani-Kərimlə bağlı fəaliyyətə qatılması olduqca dəyərli
bir faktdır.
Güman
etmirəm ki, dünyanın hansısa bir nöqtəsində belə böyük həvəs və stimulla bu
qədər çoxsaylı bir toplum Quranla bağlı işlərdə bu cür fəallıq göstərsin.
Əlbəttə, bu barədə məndə dəqiq məlumat yoxdur, mən bunu araşdırmamışam. Lakin
eşitdiyimiz ümumi məlumatlardan belə bir nəticəyə gəlmək mümkündür. Belə bir
şey olsaydı, yəqin ki, eşidib bilərdik. Mən güman etmirəm ki, İslam dünyasının
başqa bir yerində belə bir şey ola. Bu, yalnız sizlərin hünəridir!
Qurani-Kərimin müxtəlif problemləri ilə – sırf elmi problemlərdən tutmuş təbliğat
işi, habelə pedaqoji problemlərlə bağlı tədqiqat aparan, incəsənət sahəsində
çalışan bu qədər xanımın olması, zənnimcə, olduqca dəyərlidir. Əlbəttə, əgər
təklif olunduğu kimi beynəlxalq müsabiqələr məsələsi reallaşsa və bu sahədə qəti
addımlar atılsa (Əlbəttə, bu təklif ətrafında ciddi araşdırma aparılmalı, bu
məsələnin müxtəlif cəhətləri ölçülüb-biçilməlidir), o zaman İran qadınının
Quran sahəsində gördüyü işin əhəmiyyəti daha da aydın olacaq. Və Qurani-Kərimlə
bağlı belə bir diqqətəlayiq fəaliyyətə imza ata bilmək həm İran qadını üçün,
həm də İslam Respublikası üçün böyük bir iftixardır.
Quranla
əlaqədar olaraq biz açıq etiraf etməliyik ki, cəmiyyətimiz illər boyu Qurandan
uzaq olmuşdur. Hazırda biz İslam Respublikası olaraq cəmiyyətimizlə Qurani-Kərim
arasındakı bu fasiləni azaltmaqdayıq; geridə qaldığımız məqamların yerini
doldurmaqdayıq. Lakin unutmayaq ki, geriliyə düçar olduğumuz məqamlar olduqca
çox olub. Despotik rejimlərin hakimiyyəti dövründə Quran cəmiyyətimizdə rəsmi
bir mövqe tutmurdu. Ola bilsin ki, qıraq-bucaqda müəyyən şəxslərin Quranla
tanışlığı var idi – dindar insanlar evlərində Quran oxuyardılar – lakin bu
tanışlıq yalnız Quran tilavəti ilə məhdudlaşırdı. Quranın mahiyyəti barədə
düşünmək xüsusilə də ümumcəmiyyət səviyyəsində, ictimaiyyət arasında çox az
təsadüf olunan bir şey idi; həddən artıq az idi. Elə bunun nəticəsi olaraq da
ziyalı ictimaiyyətimiz və ali təhsil ocaqlarında çalışan insanlarımız Qurandan,
ümumiyyətlə, uzaq idilər. Həqiqətən də, o dövrün təhsilli insanları arasında
kiminsə Quranla ünsiyyətdə olması, Quranla tanışlığının olması – əlbəttə, geniş
və dərindən tanışlığı nəzərdə tutmuram; Quran barədə məhdud şəkildə olan
bilgilərdən danışıram – tez-tez rast gəlinən bir hal deyildi. Yalnız əvvəllər
dini məktəblərdə təhsil almış və həmin dövrdən bəzi Quran ayələrinin yaddaşına
həkk olunduğu insanlara təsadüf etmək olardı. Lakin digər müsəlman
dövlətlərində, xüsusilə də ərəb ölkələrində şərait tamamilə fərqli olduğu üçün
vəziyyət də bu cür deyildi; bu günün özündə də belədir. Həmin ölkələrdə hətta
müxtəlif yüksək dövlət postlarını tutan ali təhsilli, ziyalı insanlarla görüşəndə
onların söhbət əsnasında Quran ayələrindən misal gətirdiyini, məhz bu ayələrin
köməkliyi ilə arqumentlər gətirərək öz fikirlərini əsaslandırdığını görürük. Hazırkı
gənc nəslimizdə bu olsa da, köhnə ziyalı ictimaiyyətimiz arasında belə bir şey
yox idi. Bunun səbəbi isə Qurandan uzaq düşməyimizdə idi. Həmin ölkələrdə təlim
və tərbiyənin keyfiyyətinin nə vəziyyətdə olmağı isə başqa bir mövzudur. Məxsusən
də ərəb ölkələrində bu, geniş yayılmış bir hal idi; hazırda da bu var. Biz
İslam İnqilabının əvvəllərindən bəri belə bir hala qarşı mübarizə aparırdıq.
Biz ərəb ölkələrinin siyasətçilərinin və dövlət rəsmilərinin əməldə Quranın
əsaslarından uzaq olmasına öz etirazımızı, həm də haqlı etirazımızı
bildirirdik. Lakin onların təfəkküründə və dilində Quran var idi. Və bizlər həmişə
təəssüf hissi keçirirdik ki, nəyə görə biz belə deyilik? Misal üçün, belə bir
bənzətmə aparım ki, İranda poetik zövqlü insanlar söhbətarası Sədinin
“Gülüstan”ından, Hafizin şeirlərindən, yaxud başqa bir məşhur şairin
yaradıcılığından misraları misal gətirdikləri kimi, onlar da bu məqsədlə Quran
ayələrindən istifadə edirdilər. Ölkəmizdə isə belə deyildi. Biz məhz İslam
İnqilabından əvvəlki dövrdə mövcud olan tərbiyə metodu ucbatından Qurandan uzaq
düşmüşdük. Hal-hazırda isə bu itkinin yerini doldurmaq istəyirik. İnsafən, bu
məqsədlə İslam İnqilabının əvvəllərindən bəri bir çox işlər görülüb və bunların
müsbət nəticəsini də hazırda müşahidə etməkdəyik. Lakin bu, hələ işin
başlanğıcıdır; yolun başlanğıcıdır. Quranla çulğalaşmaq, Quranla yoğrulmaq
lazımdır. Quranda toxunulan mövzular həyat üçündür, yalnız məlumat xarakteri
daşımır. Bəzən insanın Quran barədə məlumatı yaxşı olur, lakin onun yaşam
tərzində Qurani-Kərimdən heç bir əsər-əlamət görünmür. Xanımlardan bəziləri də
bunu qeyd etdilər. Biz çalışmalıyıq ki, Quran həyatımızda təcəssüm etsin. Əziz
İslam Peyğəmbərinin (s) zövcələrindən birindən Peyğəmbərin (s) əxlaqı barədə
soruşanda o, cavabında belə deyir:
كان خلقه
القرآن
“Onun
əxlaqı Quran idi”. (“Fəzailul-Xəmsə”, cild 1, səh.117)
Yəni onun
əxlaqı təcəssüm etmiş bir Quran idi. Bax, bu, bizim cəmiyyətimizdə
gerçəkləşməlidir.
Olduqca
aşkar olan bir həqiqət də vardır ki, məhz həddən artıq aşkar olması ucbatından
əksər hallarda gizli qalır. Gəlin, bu həqiqəti də qeyd edək, açıqlayaq. Bu
həqiqət İslam Respublikasının gerçəkləşməsi faktının özüdür. Bunun özü, sözün
əsl mənasında, Quranın təcəssüm etməsi deməkdir. İslam Respublikası dövlət
quruluşu – dini yönümlü bir dövlət quruluşu, əslində, Qurana əməl etməyin ən
böyük paraqraflarından biridir və məhz İslam İnqilabı bizim üçün bunu təmin
etmişdir. Biz bundan əsla bixəbər olmamalıyıq. Bəli, bu geniş çərçivə daxilində
doldurulmalı olan bir çox xanalar, görüləsi bir sıra işlər var. Lakin ən əsas,
ən başlıca iş bu qurumun ərsəyə gəlməsi idi. Dinə əsaslanan bir qurumun
yaradılması idi. Elə bir qurum ki, onun rəsmilərinin daxili potensialı,
amalları, bütün xüsusiyyətləri, fəaliyyəti xalqla əlaqəli olsun, yəni onların
başlıca fəaliyyət istiqamətini dinə əsaslanaraq, dinin, İslamın göstərdiyi yola
uyğun olaraq xalqa xidmət etmək təşkil etsin. Bu, Qurana əməl etmək prinsipləri
içərisində ən böyük bir prinsipdir. Başqa sözlə desək, bu, elə Allah Rəsulunun
(s) Mədinəyə gəlmək, Məkkədən Mədinəyə hicrət etməklə gördüyü həmin işdir.
Konkret qurum, konkret cəmiyyət formalaşmayınca, bütün ictimai fəaliyyətləri öz
əhatə dairəsinə ala biləcək mərkəzləşmiş hakimiyyət qurulmayınca görülən işlərə
zəmanət verilə bilməz. İslam İnqilabından əvvəl ictimaiyyətə öyüd-nəsihət
verməyə çalışan az sayda xeyirxah insanlar var idi. Onlar ürək yanğısı ilə,
hiddətini içində boğaraq hey insanlara öyüd-nəsihət verir, moizələr edirdilər (Bu
işdə onlar kütləvi, yaxud daha məhdud dairəli informasiya vasitələrinin
köməyindən istifadə edirdilər). Sözsüz, moizələr də effektsiz qalmır,
insanların qəlbində öz təsirini qoyurdu. Lakin bütün bunlar praktik şəkildə
reallaşa bilmirdi. Çünki mövcud qurum yanlış bir qurum idi. Habelə cəmiyyətin
mövqeyi də ədalətin, vicdanın, insafın, əxlaq və mənəviyyatın əleyhinə
köklənmiş bir mövqe idi. Belə bir şəraitdə nə qədər israr edib kimi isə
ədalətə, rəhmə, insaflı olmağa çağırsanız da, nəticəsi olarmı?! Cəmiyyətin
hansı ruhda köklənmiş olması olduqca mühümdür. Məhz bunun əsasında konkret bir
sistemin, bəlli bir qurumun – doğruluq və din üzərində köklənmiş bir qurumun
formalaşması durur və bu işi isə məhz İslam İnqilabı gördü; belə bir qurumun
təməlini qoydu. Demək istədiyim budur ki, Quran tədqiqatçılarımız, enerji dolu,
həvəsli gənclərimiz bu həqiqəti yaddan çıxarmamalıdırlar. Bu, olduqca aşkar və
açıq-aydın bir həqiqətdir. Lakin əksər hallarda insanlar bu aşkar həqiqətə
lazımi əhəmiyyət vermir və sanki ondan bixəbər qalırlar. Unutmayın ki, bu, son
dərəcə önəmli olan bir həqiqətdir.
Bu çərçivə
daxilində Quranın göstərdiyi yolla quruculuq işinə başlamalı və əsas işləri
görməliyik ki, mahiyyətimiz Qurandakı kəlmələrin əsl mənası ilə uyğunlaşsın. Fərdi,
administrativ, korporativ davranışımız, təlim-tərbiyə prosesindəki
davranışımız, yəni ali məktəblər, tədqiqat mərkəzləri və elmi-teoloji hövzə də
daxil olmaqla bütövlükdə təlim-tərbiyə sistemimiz, beynəlxalq arenadakı
davranışımız – bütün bunlar İslama əsaslanmalıdır. Yaxşı, bəs bu, nə zaman gerçəkləşəcək?
Yalnız biz Quranın mahiyyəti və mənası ilə, həqiqətən də, düzgün tanış olduqda!
Yalnız o zaman! Bu işi isə istər xanım, istərsə də kişi tədqiqatçılarımızın
fəaliyyəti daxil olmaqla ölkəmizdə gedən möhtəşəm Quran tədqiqatı hərəkatı
gerçəkləşdirə bilər. Bəli, o əsas istiqamət məhz bu olmalıdır. Tədqiqatlar bu
istiqamətə yönəldilməlidir.
Qurani-Kərimin
tədqiqatı ilə bağlı mühüm bir məqam da bundan ibarətdir ki, Quran sahəsində hər
hansı bir iş görmək istəyən şəxs qəlbini
saf Quran həqiqətləri ilə üzbəüz gəlmək üçün hazır vəziyyətə gətirməlidir. Yəni
qəlbini çirkinliklərdən təmizləməlidir. Ürək çirkinliklərdən təmizlənməsə,
Quranın dilindən haqqı və həqiqəti qəbul etməyə hazır olmasa, Allahdan və İslamdan
uzaq olan prinsiplərə bağlı olsa və insan bu halda Quranla görüşsə belə, ondan
yararlana bilməyəcək. Odur ki, Quran belə buyurur:
يضلّ به كثيرا
و يهدى به كثيرا
“...(Bəli,
Allah) onunla (bir həqiqəti bəyan etməklə) çoxlarını azdırır və çoxlarını
onunla hidayət edir...” (“Bəqərə” surəsi, ayə 26)
Yaxşı, bəs “Quran
azdırır” nə deməkdir? Quran hidayət edir, bu məlumdur! Bəs “Quran azdırır” nə
mənadadır? Bu, ona görədir ki:
و أمّا الّذين فى
قلوبهم مرض فزادتهم رجسا الى رجسهم
“Qəlblərində
(şirk, küfr və nifaq) xəstəliyi olanlara gəldikdə isə onların murdarlığının
üstünə daha bir murdarlıq artırdı...”(“Tövbə” surəsi, ayə 125)
Deməli, qəlblərində
mərəz olan kəslər Quranı oxuyanda onların mənəviyyatındakı çirkinlik daha da
artacaq. Yəni Quran ayəsi və ya surəsi onların daxilindəki çirkinliyi
bir az da artıracaq. Bəs bu çirkinlik nədən ibarətdir? Qəlblərdəki bu “mərəz”
nə mərəzdir? Bu mərəz elə əxlaqi çirkinliklərdən ibarətdir. Paxıllığa,
bədxahlığa, hərisliyə, dünyapərəstliyə düçar olanda, şəhvət bizə qalib gələndə,
qüdrət və hakimiyyət həvəsi bizə güc gələndə, haqqa göz yummaq, haqqı gizlətmək
və ədalətə qənim çıxmaq ruhumuza, qəlbimizə hakim kəsiləndə Qurandan istifadə
etmirik. Quranın bizə verməli olduğunun əksinə olan şeyləri əxz edirik. Bunlardan
Allaha pənah aparmaq lazımdır. Görürsən ki, bəzən bəzi insanlar Quran ayələrini
İslama zərbə vurmaq məqsədilə oxuyurlar. İslam Respublikasına zərbə vurmaq üçün
oxuyurlar! İslam Respublikasının bizə bəxş etdiyi fəzilətləri məhv etmək üçün
oxuyurlar! Quranla mənəviyyatı pak surətdə görüşmək lazımdır ki, Quranın nuru,
Quranın dediyi qəlbimizi ələ alsın və İnşaallah, ondan yararlana bilək.
Qurani-Kərimin
tədqiqatları mövzusunda qeyd olunması yerinə düşən önəmli məsələlərdən biri də
budur ki, Quranla bağlı aparılan tədqiqatlarda fundamental elmi işlərə böyük ehtiyac
duyulur. Belə deyil ki, ərəb dilini yaxşı bilən istənilən bir şəxs Qurandakı
bütün mətləbləri anlayıb dərk etsin; Quran tədqiqatçısı olsun. Xeyr! Əvvəla,
Quranın özü ilə ünsiyyət qurmaq lazımdır. Yəni Qurani-Kərimi tədqiq edən şəxs
bütövlükdə Quranla yaxın ünsiyyətə girməlidir. Quranı dəfələrlə oxumaq, onun
barəsində şəxsən dərindən düşünmək müqəddəs kitabda hər hansı bir mövzuda
həqiqəti araşdırdığımız zaman onunla bağlı müsbət nəticə əldə etməkdə bizə
yardım edir. Demək ki, Quranla ünsiyyət qurmağın özü olduqca zəruri bir amildir.
Bundan
əlavə, Qurandan istifadə tərzi də mühümdür. Din alimlərimizin, fəqihlərimizin
ayə və rəvayətlərdən istifadə metodu təcrübədən keçmiş, elmi baxımdan
püxtələşmiş, təkmilləşmiş və tam sınanmış bir metoddur. Bunları mənimsəmək olduqca
vacibdir. Mən demirəm ki, Qurani-Kərimi tədqiq etmək istəyən hər bir şəxs
illərlə dini təhsil almalıdır. Mən bunu nəzərdə tutmuram. Lakin Quran tədqiqatı
işində Quranı dərk etmək üçün zəruri olan ilkin şərtlər çox mühümdür; onların
sırasına dili bilmək, dilin incəliklərinə bələd olmaq, fiqhin əsaslarından
bəziləri ilə tanışlıq, Quranda olan rəvayətlərdən istifadə edə bilmək də daxildir.
Bütün bunlar Qurani-Kərimin tədqiqatında olduqca effektlidir.
Son olaraq bir məsələni də qeyd edək: mən dəfələrlə, elə bu yaxınlarda da ali təhsil ocaqlarımızda humanitar elmlərin tədrisi ilə bağlı gileyimi bildirmişəm. Ölkəmizdə tədris olunan humanitar elmlər Quranın və İslamın fundamental əsasları ilə ziddiyyət təşkil edən əsaslar üzərində qurulub. Qərbin humanitar elmləri fərqli bir dünyagörüşünə, varlıq aləminin tamamilə başqa cür qavranılmasına, əksər hallarda isə maddi baxış aspektinə əsaslanır. Bəli, bu baxış aspekti tamamilə yanlışdır. Bu cür əsaslanma qeyri-düzgündür. Həmin humanitar elmləri biz tərcümə edərək daxilinə heç bir İslami tədqiqatın nüfuz etməsi üçün şərait yaratmadan gətirib ali məktəblərimizdə, müxtəlif sahələrdə tədris edirik. Halbuki, humanitar elmlərin kökünü, əsasını və bünövrəsini Quranda axtarmaq lazımdır. Quran tədqiqatının mühüm əhəmiyyət kəsb edən sahələrindən biri də məhz budur. Müxtəlif sferalarda Quranda qeyd edilən incə mətləblərə diqqət yetirmək, humanitar elmlərin əsaslarını Qurani-Kərimdə axtarıb-tapmaq lazımdır. Bu, olduqca mühüm və prinsipial bir işdir. Əgər bu reallaşsa, müxtəlif humanitar elm sahələrindəki mütəfəkkirlərimiz, tədqiqatçılarımız və alimlərimiz bu bünövrə və əsaslar üzərində uca binalar qura bilərlər. Şübhəsiz ki, o zaman başqalarının – qərblilərin və humanitar elm sahələri üzrə inkişaf etmiş xalqların nailiyyətlərindən də istifadə edə bilərlər. Lakin bütün bunlar yalnız və yalnız Quranın bünövrəsi üzərində qurulmalıdır.
Ümidvarıq
ki, Uca Yaradan sizlərə dəstək və yardımçı olacaq. Mən möhtərəm xanımlarımızın
hamısına – ölkənin müxtəlif bölgələrində Quranla bağlı fəal iş aparan dəyərli
xanımlarımıza öz səmimi təşəkkürümü bildirirəm. Sizlərin Quranla bağlı
tədqiqatlar sahəsindəki bu fəal iştirakınız ölkənin qadın ictimaiyyətinə ilham
verəcək və ölkəmizin qadınlarını – başqa sözlə, cəmiyyətimizin yarısını Qurana
doğru istiqamətləndirəcək. Qadınlar Qurani-Kərimlə yaxın ünsiyyət qursalar,
cəmiyyətin bir çox problemləri həll olunacaq. Çünki gələcək nəslin insanları məhz
qadının qoynunda yetişir və Qurana bələd olan, Quranla ünsiyyətdə olan, Quran
məfhumları ilə qarşılıqlı anlaşmada olan bir qadın övlad tərbiyəsində bir çox
müsbət təsirlər qoya bilər. Ümidvarıq ki, İnşaallah, sizlərin həyata
keçirdiyiniz bu möhtəşəm hərəkatın bərəkəti sayəsində cəmiyyətimizin sabahı
Qurani-Kərimlə bugünkündən dəfələrlə çox çulğalaşmış olacaq.
Allahın
salamı, rəhməti və bərəkəti sizlərə olsun!
Seyid
Əli Xamenei
20
oktyabr, 2009-cu il